Nýtt og ferskt útlit!

Já nú erum við Dagur búin að vera seinustu daga að vinna í að breyta þessari blessaðri síðu minni og er ég mjög sátt með útkomuna!

Hún er svolítið bleik, en þeir sem þekkja mig eru örugglega ekki hissa. Ekki að ég klæðist alltaf bleikum fötum, alls ekki, ég er engin barbídúkka. En ég hef mjög gaman að vera með bleik smáatriði í því sem ég klæðist, svo hef ég nú líka verið með bleikt hár!

Dagur er náttúrulega snillingurinn á bakvið þetta, ég sagði honum bara þetta á að vera svona, þetta öðruvísi, ekki svona, meira svona, stærra þetta, minna hitt og svo framvegis..

Takk æðislega ástin mín! ;*

Annars var nú líka gaman hjá okkur um helgina, vorum ekki bara í tölvunni allan sólarhringinn. Við fórum í matarboð bæði föstudag og laugardag!

Skólasystir Dags, hún Paulina, bauð okkur heim til sín föstudagskvöldið, ásamt 5 öðrum krökkum úr skólanum hans.

Þetta voru allt mjög hressir krakkar, maturinn góður, nóg af víni og stemmingin alveg hin besta! Enda lifir hún Paulina fyrir því að skapa ,,the perfect moment”- og ,,perfect atmosphere”. Til dæmis var eitt herbergið í íbúðinni hennar tileinkað súkkulaði og sígarettum, það herbergi hét “the chocolate chill-out room”. Þar var súkkulaði á boðstólum, kertaljós, tímarit, sígarettur, ilmkerti, súkkulaði-bíómynd,-don’t ask, og það sem toppaði þetta allt var súkkulaði BJÓR! Já í alvöru, þetta var bjór sem smakkaðist eins og súkkulaði, örugglega kvenmaður sem fann þann upp!

Já svo fóru krakkarnir allir í bæinn eftir miðnætti, á einhvern tónlistarviðburð, en þar kostaði 60krónur inn, og höfum við Dagur nú ekki efni á því svo að við fórum bara heim að kúra ;)

Svo í gær vorum við í mat hjá Nönnu frænku, á Vesterbro. Þar fengum við sinneps-hunangs-gljáðar kjúklingabringur sem voru mjög góðar, ég veit sko alveg hvað Dagur mun elda í vikunni! Eftir cappuccino og desert sátum við heillengi að spjalla en ákváðum um ellefuleytið að kíkja út á kaffihús eða pöbb, og fórum við í góðan göngutúr um Vesterbro og Istedgade en enduðum á Old English Pub þar sem Nanna splæsti á okkur bjór og við sátum og görguðum á hvort annað með Live-music í “bakgrunni”. Það var æðislega gaman!

Jæja, þetta er nóg í bili, ég lofa að vera meira dugleg að blogga hérna á nýju sætu síðunni minni! Svo á ég eftir að setja inn “Verkefnin mín”, þar ætla ég að setja inn allt það sem ég hef verið að gera undanfarið. Mikið spennandi framundan!

Svo að endilega kommentið og segið mér hvernig ykkur finnst nýja lúkkið! =)